पर्वतको महाशिला गाउँपालिकामा सुत्केरी महिलाहरुलाई निशुल्क एम्बुलेन्स सेवा
पर्वत । पर्वतको महाशिला गाउँपालिकाले सुत्केरी महिलाहरुलाई निशुल्क एम्बुलेन्स सेवा उपलब्ध गराएको छ । समयमै उपचार नपाएका कारण नागरिकले अकालमै ज्यान गुमाउन नपरोस भनेर ग्रामीण क्षेत्रमा एम्बुलेन्स सेवा संचालनमा ल्याएको गाउँपालिकाका अध्यक्ष इश्वरी प्रसाद भुषालले बताउँनुभयो । ‘गाउँपालिकाले आम नागरिकलाई अनुभुति हुने गरि निशुल्क एम्बुलेन्स सेवा अघि सारेको बताउँनुभयो । एम्बुलेन्स भाडा तिर्न नसकेर घरमै सुत्केरी हुँदा कतिपय आमा र नवजात शिशुको मृत्यु भएको खबर पनि सुनिन्छन । उहाँले भन्नुभयो, ‘अबको दिनमा भाडा तिर्ने पैसा नभएकै कारण कुनैपनि गर्भवती–सुत्केरी, महिला स्वास्थ्य सेवाबाट बन्चित हुन नपरोस भन्ने उद्देश्यले गाउँपालिकाले एम्बुलेन्स सेवा निशुल्क गरिदिएको छ ।’
गाउँपालिकाले सुत्केरी महिलालाई अस्पतालबाट घर सम्म र सुत्केरी हुने महिलालाई अस्पताल सम्म पु¥याउँन निशुल्क एम्बुलेन्स सेवा उपलब्ध गराउँने गाउँपालिकाका प्रमुख प्रशासकिय अधिकृत हरि प्रसाद पराजुलीले जानकारी दिनुभयो । पराजुलीले वडा भित्र २ हजार,पालिका भित्र,३ हजार, कुश्मा,वालिङ ५ हजार, पोखरा ९ हजार,पाल्पा १२ हजार वुटवल,चितवन १५ हजार र काठमाण्डौका लागि १७ हजार रुपैया उपलब्ध गराउँने जानकारी दिनुभयो । घरमा सुत्केरी हुँदा आमा र बच्चा दुवैको स्वास्थ्य जोखिममा परेका धेरै घटनाहरु छन् । स्वास्थ्य संस्थामा सुत्केरी हुँदा आमा र बच्चाको स्वास्थ्य राम्रो हुने सन्देश दिन पनि एम्बुलेन्स सेवा संचालनमा ल्याइएको पराजुलीले बताउँनुभयो । यस सेवाले गाउँपालिकाको ‘जिरो होम डेलिभरी’अभियानलाई साकार बनाउँन समेत सहयोग पुग्ने उहाँले बताउँनुभयो ।
एम्बुलेन्स सेवा भरपर्दो र ब्यवस्थित तवरले संचालन गरिने गाउँपालिका स्वास्थ्य शाखा प्रमुख नर बहादुर बरालले बताउनुभयो । ६ वडा रहेको गाउँपालिकाले प्रत्येक वडाबाट स्वास्थ्य सेवा प्रवाह गरिरहेको छ ।
