बिदामा पनि खुल्ने पर्वतको शान्ति आधारभुत विद्यालय- सार्वजनिक बिदा, बन्दरहडतालमा पनि नियमित पढाई

पर्वत / सरकारले जेठ पहिलो सातादेखि आइतबार पनि सार्वजनिक बिदा दिने निर्णय गर्‍यो । सोहीअनुसार देशभरका सार्वजनिक कार्यालयसँगै शैक्षिक संस्थासमेत सातामा दुई दिन बन्द हुन थाले । तर, पर्वतको एउटा यस्तो विद्यालय छ, जहाँ आइतबार मात्रै होइन, शनिबार बाहेक अन्य सार्वजनिक बिदा, बन्द/हडतालमा समेत पढाइ प्रभावित हुँदैन ।

विद्यार्थीको शैक्षिक गुणस्तर र शिक्षकको अध्यापनप्रतिको लगाब बढाउनका लागि विद्यालयमा सार्वजनिक बिदा र जस्तोसुकै बन्द/हडतालमा समेत निर्बाध विद्यालय सञ्चालन हुँदै आएको छ । नियमितजस्तै शिक्षक समयमै हाजिर हुन्छन् ।

जलजला–६ शालिजाको भोटेडाँडास्थित शान्ति आधारभूत विद्यालयमा हरेक दिन पढाइ हुन्छ । गत वर्ष लामो समय लकडाउन हुँदासमेत नियमित कक्षा सञ्चालन भयो । हरेक चाडपर्व वा स्थानीय पर्वमा संघ, प्रदेश र स्थानीय सरकारले दिने सार्वजनिक बिदामा समेत विद्यालय खुल्छ । दसैंमा समेत सप्तमीदेखि एकादशी र कोजाग्रत पूर्णिमामा मात्रै बिदा हुन्छ । शुक्रबार पनि अतिरिक्त क्रियाकलाप आयोजना गरेर साँझ ४ बजेसम्म नै पढाइ हुँदै आएको छ ।

विद्यालयमा सबैजसो स्थानीय शिक्षक छन् । एकजना मोदी गाउँपालिकाकी शिक्षिका छन् । उनलाई विद्यालयकै व्यवस्थापनमा आवासको व्यवस्थापन गरिएको छ । मोदी–७ राम्जाकी पुष्पा पौडेल विद्यालयको काम छोडेर हत्तपत्त घर जाँदिनन् । ‘यही काम भनेपछि घरको सबै काम बिर्सिनुपर्‍यो,’ पौडेल भन्छिन्, ‘बालबालिकासँग बसेपछि सबै बिर्सिंदोरहेछ । मलाई घरमाइती जे भने पनि यही विद्यालय छ ।’ बालबालिकालाई हरेक दिनजसो नयाँनयाँ क्रियाकलाप गराउन र रचनात्मक सीप सिकाउन पौडेल दिनरात सक्रिय हुन्छिन् । विद्यालयले दैनिक कुनै न कुनै नयाँ रचनात्मक गृहकार्य दिएर पठाउँछ । बालबालिकाको कलिलो उमेरमा कुलतको बाटोबाट जोगाउनका लागि यस्तो गरिएको प्रधानाध्यापक शिव सुवेदी बताउँछन् । ‘यसमा सबै अभिभावकले हामीलाई रचनात्मक सहयोग गर्नुभएको छ,’ सुवेदीले भने, ‘हामीले पढाइ हुन्छ भनेपछि अभिभावकले कुनै दिन पनि विद्यार्थी घरमा रोक्नुहुन्न ।’

शिक्षकको लगाब र मेहनतबाट प्रभावित भएर नै अभिभावकले विद्यालयका लागि पनि नियमित सहयोग गर्दैआएका छन् । अभिभावककै सहयोगबाट २ जना शिक्षक राखिएको छ । विद्यालयले ४ वर्षअघिदेखि नै अंग्रेजी माध्यमबाट पठनपाठन सुरु गरेको हो । त्यसअघि सबैजसो अभिभावकले स्थानीय निजी विद्यालयमा बालबालिका पठाउँथे । विद्यालयमा विद्यार्थी संख्या घट्न थालेपछि सुरु भएको अंग्रेजी माध्यमको पढाइ अहिले ‘ब्रान्ड’ बनेको छ । बिहान ९ बजे नै विद्यालय उपस्थित भएका शिक्षकहरू अतिरिक्त क्रियाकलाप र विद्यार्थीलाई नयाँ रचनात्मक गृहकार्यबारे छलफल गर्छन् । साँझ बिदा भएपछिको करिब दुई घण्टा विद्यालयकै उन्नतिबारे छलफल गरिने व्यवस्थापन समितिका अध्यक्ष नारायणदत्त सापकोटाले बताए ।

शिक्षकहरूको लगाबकै कारण यो विद्यालयको शैक्षिक विकासमा उल्लेख्य सफलता मिलेको अध्यक्ष सापकोटा बताउँछन् । ‘हाम्रा शिक्षकजत्तिको लगनशील र पेसाप्रति इमानदार कुनै सरकारी कर्मचारी भेट्टाएकै छैन,’ सापकोटाले भने, ‘उहाँहरू घामपानी, दिनरात नभनी खट्नुभएको छ ।’ ईसीडीदेखि कक्षा ८ सम्म पढाइ हुने भएर पनि विद्यालयमा शिक्षक दरबन्दीको भने अभाव छ । एक जना मात्रै स्थायी दरबन्दीका शिक्षक छन् । बाँकी ६ जना अस्थायी । त्यो सबै अभिभावकले चन्दा दिएको रकमबाटै व्यवस्थापन हुँदै आएको छ । जलजला गाउँपालिकाका प्रशासकीय अधिकृत राजेन्द्रबहादुर क्षत्रीले पालिकामै अब्बलमध्येको यो विद्यालयको शैक्षिक विकास र शिक्षक दरबन्दीका लागि पालिकाले चासो दिएको बताउँछन् ।कान्तिपुर दैनिकले समाचार छापेको छ । 

सम्बन्धित समाचार

Leave a Reply

टाइप गरेर स्पेस थिच्नुहोस् र नेपाली युनिकोडमा पाउनुहोस। (Press Ctrl+g to toggle between English and Nepali OR just Click on the letter). अंग्रेजीमा टाइप गर्न "अ" मा थिच्नुहोस्।

भर्खरै view all

कुश्मा नगरपालिकाको आगामी बजेट ८९ करोड ९० लाख

जलजलाको आगामी बजेट : शिक्षा र कृषि क्षेत्रलाई प्राथमिकता

प्रचण्डले ‘आरोपपत्र’ फिर्ता लिएको भए नेकपा जोगिन्थ्यो : वामदेव गौतम

मोदी गाउँपालिकाको आगामी बजेट ७३ करोड ५२ लाख

आज यी प्रदेशमा भारी वर्षाको सम्भावना, सतर्क रहन विभागकाे आग्रह