मोदीमा दोस्रो राष्ट्रिय सभा अध्यक्ष कप शुरु
पर्वत । जिल्लाको मोदी गाउँपालिकामा दोस्रो राष्ट्रिय सभा अध्यक्ष कप प्रतियोगीता शुरु भएको छ । मोदी गाउँपालिकाको पर्यटकीय गाउँ चित्रे शुरु भएको उक्त प्रतियोगीताको एक कार्यक्रमका वीच राष्ट्रिय सभाका अध्यक्ष गणेश प्रसाद तिमिल्सीनाले औपचारिक रुपमा शुरुवात गरेका छन् ।
प्रतियोगीताको शुरुवात गर्दै अध्यक्ष तिमिल्सीनाले खेलकुदको माध्यमबाट स्वस्थ रहन युवाहरुलाई अनुरोध गरे । उनले प्रतियोगीता भर मोदी बासीले खेलकुदसंगै मनोरञ्जन समेत लिएर प्रतियोगीतालाई सफल बनाउन समेत अनुरोध गरे । जिल्लाको विकास निर्माणमा आफू सधै चिन्तित रहेको र सक्दो प्रयासका कारण धेरै ठूला आयोजनाहरु जिल्लामा भित्रिएको स्मरण गराउदै सम्बृद्ध मोदी निर्माणको लागि आफ्नो सार्थक पहल रहने प्रतिबद्धता दोहोराए ।
कार्यक्रममा प्रतिनिधि सभाका सांसद पदम गिरी, संविधान सभा सदस्य अर्जुन जोशी, कल्पना चापागाई, प्रदेश सभा सदस्य ललितकला गुरुङ, गाउँपालिका उपाध्यक्ष सेती महत लगाएतले शुभकामना मन्तब्य राखेका थिए । गाउँपालिकाका प्रमुख प्रशासकीय अधिकृत किसानबहादुर क्षेत्रीले सञ्चालन गरेको कार्यक्रमको अध्यक्षता गाउँपालिका अध्यक्ष प्रेम पौडेलले गरेका थिए ।
सोहि दिन जनसिद्ध माविमा नवनिर्मित ४ कोठे भवनको अध्यक्ष तिमिल्सीनाले उद्घाटन समेत गरेका छन् ।
