११ दिनमा २४ हजार नेपालीलाई स्वदेश फर्काउने सरकारको योजना

काठमाडौं, ३२ जेठ । विदेशमा अलपत्र परेका नेपाली नागरिकलाई सरकारले आइतबारदेखि फर्काउन सुरु गर्ने भएको छ ।

पहिलो दिन आइतबार बंगलादेशमा रहेका विद्यार्थीलाई फर्काउन नेपाल एयरलाइन्सको वाइडबडीले उडान भर्नेछ । सरकारले आगामी असार ११ गतेसम्म विभिन्न मुलुकबाट करिब २४ हजार नेपाली फर्काउने योजना बनाएको छ ।

विदेशमा जोखिममा परेका नागरिकलाई स्वदेश फर्काउन नेपाली र विदेशी एयरलाइन्सले ६७ उडान भर्नेछन् । सरकारले दुई एयरलाइन्स कम्पनीका दैनिक १० उडानबाट नबढ्ने गरी तालिका बनाएको छ ।

० उडानबाट २ एयरलाइन्सले दैनिक १ हजार ८ सय ल्याउनेछन् । नेपाली एयरलाइन्स कम्पनीले ४३ उडान गर्नेछ । त्यसमध्ये वायुसेवा निगमले २४ र हिमालय एयरलाइन्सले १९ उडान गर्नेछन् । विदेशी एयरलाइन्सले २४ उडान गर्नेछन् ।

हवाई भाडा महँगो भएपछि उडानै रद्द


नेपाल सरकारले चार्टर्ड फ्लाइटद्वारा अलपत्र परेका नेपालीलाई फर्काउन भाडा तोकेको थियो । तर, हवाई भाडा अत्यधिक महँगो भएपछि विभिन्न मुलुकहरूले चार्टर्ड फ्लाइट रद्द गरेका छन् । माल्दिभ्सस्थित नेपाली दूतावासले सूचना जारी गरी माल्दिभ्सबाट असार १ गते नेपाल एयरलाइन्सले गर्ने भनिएको चार्टर्ड फ्लाइट स्थगित गरिएको जनाएको छ ।

त्यस्तै, साउदीबाट गर्ने भनिएको उडानसमेत रद्द गरिएको साउदीका लागि नेपाली राजदूत महेन्द्रप्रसाद सिंहले जानकारी दिए । दूतावासले सूचना नै जारी गरी नयाँ भाडादर र तालिका प्राप्त नहुन्जेल उडान स्थगित गरिएको जनाएको छ । दूतावासले श्रमिकहरूलाई तत्काल पिसिआर र आरडिटी परीक्षण नगर्न समेत अनुरोध गरेको छ ।

त्यस्तै, १ असारमा हुने भनिएको मलेसिया उडानसमेत रद्द हुने भएको छ । १ गतेका लागि शनिबारसम्म टिकट बुकिङ सुरु नभएको मलेसियाका लागि नेपाली राजदूत उदयराज पाण्डेले जानकारी दिए । ‘आजसम्म टिकट खुला भएको छैन,’ उनले भने, ‘१ गते उडान नहोला जस्तो छ ।’

हवाई भाडा महँगो भएकाले अधिकांश श्रमिक नेपाल सरकारले तोकेको एयरलाइन्सबाट स्वदेश फर्किन नसक्ने गैरआवासीय नेपाली संघ मलेसियाका अध्यक्ष हरि भट्टराईले बताए ।

कुवेतबाट आइतबार करिब ३ सय फर्काइँदै

कुवेतबाट आइतबार करिब ३ सयलाई फर्काइँदै छ । कुवेत सरकारले आफ्नै खर्चमा आममाफी पाएका नेपाली कामदारलाई फर्काउने क्रममा आइतबार दुई उडानबाट नेपाली फर्काउने भएको हो । आइतबार कुवेतको समयअनुसार पहिलो उडान बिहान ४ बजे र दोस्रो ६ बजे हुनेछ ।

गत बिहीबार एयर जजिरा पहिलो उडानमा १ सय ५० र दोस्रो उडानमा १ सय ४९ नागरिक फर्किसकेका छन् । शुक्रबार पनि एयर जजिराको एक उडानबाट तीन बालबालिकासहित १ सय ४९ महिला नेपाल फर्किएका छन् ।

ओमानबाट सोमबार १८० नेपाली फर्किंदै

आगामी सोमबार ओमानबाट १ सय ८० जना श्रमिक फर्काइँदै छ । ओमानको सलाम एयरमार्फत जोखिममा रहेकामध्येलाई पहिलो उडानमार्फत नेपाल फर्काउन लागिएको ओमानका लागि नेपाली राजदूत शर्मिला पराजुलीले जानकारी दिइन् ।

उनका अनुसार ओमानबाट फर्किने नेपालीले टिकट खर्च आफैँले व्यहोर्नेछन् । नेपाल एयरलाइन्सले तोकेको भाडादरभन्दा सलाम एयरको भाडा धेरै कम भएको राजदूत पराजुलीले बताइन् ।

‘सरकारले दुईपटक गरी ३० प्रतिशत हवाई भाडा घटाएको छ । यो राम्रो काम हो,’ उनले भनिन्, ‘तर, यतिवेला एयरलाइन्सको व्यवसायभन्दा पनि नेपाली पीडित श्रमिकबारे सोच्ने वेला हो ।’ ओमानबाट ६ सय १५ जना नेपालीले नेपाल फर्किनका लागि अनुमति पाएका छन् । नयाँ पत्रिका दैनिकबाट

सम्बन्धित समाचार

Comments are closed

भर्खरै view all

राष्ट्रिय सभाका अध्यक्ष तिमिल्सिना संग थाई नेपाली संघका पदाधिकारी भेट- गैह्र आवासीय नेपाली परिचयपत्र उपलब्ध गराउन पहलका लागि आग्रह

पर्वतका कुस्मा र फलेबास नगरपालिकाले ल्याउन सकेनन बजेट

ग्रामीण क्षेत्रलाई सुरक्षित राख्न गाउँ अभियानमा ट्राफिक

बन्दीपुरमा केबलकार-रोप परीक्षण र गोन्डोलामार्फत सामान बोकेर लोड परीक्षण

राष्ट्रिय सभाका अध्यक्ष तिमिल्सिना र चीनको जनकंग्रेसका अध्यक्ष बिच भेटवार्ता , ‘छेन्दु– पोखरा उडानका लागि चीन तयारी अवस्थामा’