म्याग्दीमा पहिरोले पुरिएर दुई जनाको मृत्यु

म्याग्दी, २८ जेठ । म्याग्दीमा गएराती परेको पानीले आएको पहिरोमा परि दुई जनाको मृत्यु भएको छ । जिल्लाको रघुगंगा गाउपालिका–६ कोटगाउँ पहिरोमा पुरिएर गएराती दुई जनाको मृत्यु भएको छ ।
मृत्यु हुनेहरुमा ५० वर्षीया हमाया शेरपुञ्जा र उनकी ४ वर्षीया नानिती रोशनीको पहिरोले परिएर मृत्यु भएको जिल्ला प्रहरी कार्यालय म्याग्दीले जनाएको छ । मंगलबार राति ११ बजेतिर उनिहरु सुतिरहेको गोठ लेदो सहितको पहिरोले पुरिएको प्रहरी निरिक्षक धु्रबप्रसाद शर्माले जानकारी दिनुभयो ।

राती सुतिरहेको अवस्थामा बर्षापछि माथिबाट आएको पहिरो आएर दल प्रसाद शेरपुजाको श्रीमती र उनको छोरीको छोरी ४ बर्षिया नातिनीको मृत्यु भएको वडा अध्यक्ष मनकुमार शेरपुजाले जानकारी दिनुभयो ।
पाखापानी प्रहरी चौकीका प्रहरी सहायक निरिक्षक ढकबहादुर हमालको नेतृत्वमा गएका प्रहरी र स्थानीयबासीले हमाया र रोशनीलाई मृत फेला पारेका थिए ।

पहिरोले परिएर ढुङ्गा, माटोले बनेको जस्ताको छानो भएको कच्चि गोठमा रहेका अन्नपात, भाडाबर्तन लगायत सबै नष्ट भएको छ । पशु चौपायको भने क्षति भएको छैन् ।