सुर्खेतबाट ६ दिन पैदलै आएका चार जनालाई जलजलाका स्वयसेवकले समाते, चारै जना क्वारेन्टाइनमा
पर्वत, १३ जेठ/ लकडाउनको समयमा पनि लुकिछिपी पैदल हिँडेर सुर्खेतदेखि पर्वत आएका जलजला-७ धाईरिङका चारजना व्यक्तिहरूलाई गाउँपालिकाले आज क्वारेन्टाइनमा राखेको छ । सुर्खेतबाट लुकीछिपी ६ दिन लगाएर उनीहरु आजमात्रै जलजला आइपुगेका हुन् । आएका सबै एकै परिवारका सदस्य रहेको बुझिएको छ । गाउँपालिकाले खटाएका स्वयंसेवकहरूले उनीहरूलाई गाउँ प्रवेश गर्ने क्रममा मंगलबार नियन्त्रणमा लिएका थिए ।
देशभर कोरोनाको जोखिम बढ्दै गएपछि त्यसको संभावित खतराबाट बच्न जलजला गाउँपालिकाले गाउँ प्रवेश गर्ने हरेक व्यक्तिहरूको निगरानीका लागि विगत तीनसाता देखि गाउँपालिकाका ९ वटै वडामा स्वयंसेवक परिचालन गरेको छ । त्यसैगरि कोरोनाको आशंकामा पिसिआर परिक्षण गरिएका थप एकजनालाई समेत क्वारेन्टाइनमा राखिएको छ । ‘देशभर कोरोनाको संक्रमण बढ्दै गएकोले गाउँपालिकाले पनि उच्च सतर्कता अपनाएको अध्यक्ष यामबहादुर मल्ल (रामकृष्ण)ले जानकारी दिनुभयो । ‘यो महामारीबाट बच्नका लागि हामी आफैले साबधानी अपनाउनुको विकल्प छैन, त्यसैले गाउँ प्रवेश गर्ने सबै नागरिकमाथि निगरानी बढाइएको छ ।’-अध्यक्ष मल्लले भन्नुभयो ।
गाउँपालिकाले जलजला-४ मोहनचोकस्थित लुङ्दी आधारभूत विद्यालयमा २० बेडको क्वारेन्टाइन निर्माण गरेको छ । उक्त क्वारेन्टाइनलाई सुविधा सम्पन्न बनाउने तयारी भएको अध्यक्ष मल्लले वताउनु भयो । ‘क्वारेन्टाइनमा बस्ने, खाने, नुहाउने व्यवस्था लगायत मनोरञ्जनका लागि फ्रि वाइफाईको व्यवस्था समेत गर्न लागेका छौं ।’- मल्लले भन्नुभयो ।
