म्याग्दीको बिकट गाउँमा लकडाउनमा गाउँलेले खने सडक
म्याग्दी , वैशाख २०/ लकडाउनकै समयमा अन्नपूर्ण गाउँपालिका–५ शिख–किन्दुवासीले २ दशमलव ५ किलोमिटर लामो सडक निर्माण गरेका छन् । समुदायकै अग्रसरतामा ४ दशमलव ५ मिटर चौडाइको २ दशमलव ५ किलोमिटर सडक खनिएको हो ।
म्याग्दीकाे अन्नपूर्ण गाउँपालिका–५ शिख–किन्दुवासीले खनेकाे सडक । तस्बिर सौजन्य : सेते तिलिजा
गाउँपालिकाको ८ लाख २५ हजार बजेटमा सोही वडाको तल्लो शिखबस्तीबाट ४ लाख, शिखदेउराली बस्तीबाट ५० हजार, पाउद्वार बस्तीबाट १ लाख, किन्दु बस्तीबाट ५० हजार रुपैयाँ लगानीको सडकमा उपभोक्ता समितिबाट १ लाख ४७ हजारबराबरको श्रमदान गरिएको थियो । सडक खन्न गाउँपालिकाको अनुदान, चन्दा तथा श्रमदानसमेत गरी १५ लाख ७१ हजार ८ सय ७० रुपैयाँ खर्च भएको सडक निर्माण समितिले जनाएको छ ।
‘गाउँमै उपलब्ध डोजर तथा श्रमिक प्रयोग गरी सडक निर्माण गरेका छौं । गाउँपालिकामा सडक नपुगेको छेउको किन्दुबस्ती पनि अब सडक सञ्जालमा जोडियो,’ वडाध्यक्ष दिनेश तिलिजाले भने, ‘राज्यले थोरै बजेट दिँदा समुदायले धेरै लगानी थपेको छ । सडकले जोडिएपछि किन्दुबस्तीमा उत्पादित तरकारीले बजार पाउनेछ ।’
सडकले जोडिएपछि अन्नपूर्ण गाउँपालिका–५ किन्दु, गिरवाङ र झारवाङका १ सय ३० परिवार प्रत्यक्ष लाभान्वित भएका छन् ।कान्तिपुरबाट
