हालसम्म विश्वभर कोरोनाबाट एक लाख ७७ हजार ४५७ को मृत्यु, २५ लाख ५६ हजार ७९८ संक्रमित
अमेरिकामा कोरोनाबाट ज्यान गुमाउने झन बढे, एकै दिन २८ सयको मृत्यु
काठमाडौं, १० बैसाख । विश्वव्यापी कोरोना (कोभिड–१९) भाइरस संक्रमणले शक्ति राष्ट्र अमेरिका आक्रान्त बनेको छ ।
अनेक प्रयासका वावजुद पनि अमेरिकामा कोरोना संक्रमणबाट ज्यान गुमाउनेको संख्या नियन्त्रणमा आउनुको सट्टा झन बढ्दै गएको छ । पछिल्लो २४ घण्टामै अमेरिकामा कोरोना संक्रमणबाट दुई हजार ८०२ जनाको ज्यान गएको छ । यो योसँगै अमेरिकामा कोरोनाबाट ज्यान गुमाउनेको संख्या ४५ हजार नाघेको छ ।
मंगलबार एकै दिन अमेरिकामा २७ हजारभन्दा धेरै नयाँ संक्रमित थपिएका छन् । त्यहाँ संक्रमितको संख्या ८ लाख १९ हजार ८०९ पुगेको छ । अहिलेसम्म अमेरिकामा करिब ८३ हजार मात्रै उपचारपछि ठिक भएका छन् ।
कोरोना संक्रमणबाट मंगलबार विश्वभर ७ हजार ६० जनाले ज्यान गुमाएका वल्र्डओमिटरले जनाएको छ । योसँगै विश्वभर मृतकको संख्या एक लाख ७७ हजार ४५७ पुगेको छ । यो बुधबार बिहान साढे ६ बजेसम्मको तथ्यांक हो ।
अहिलेसम्म विश्वभर संक्रमितको संख्या २५ लाख ५६ हजार ७९८ पुगेको छ । त्यसमध्ये ६ लाख ९० हजार २१९ जना मात्रै उपचारपछि निको भएका छन् । बेलायतमा गएको २४ घण्टामा ८२३ जनाको कोरोना संक्रमणबाट ज्यान गएको छ ।
त्यसैगरी इटालीमा ५ सय ३४, फ्रान्समा ५ सय ३१, स्पेनमा ४ सय ३०, जर्मनीमा २२४, टर्कीमा ११९, ब्राजिलमा १५४, बेल्जियममा १७०, क्यानाडामा १४४, नेदरल्यान्डमा १६५, स्वीडेनमा १८५ जनाको कोरोना संक्रमणबाट मृत्यु भएको छ ।
अहिलेसम्म इटालीमा साढे २४ हजारभन्दा धेरै, स्पेनमा २१ हजारभन्दा धेरै, फ्रान्समा २० हजारभन्दा धेरै, युकेमा १७ हजारभन्दा धेरैको कोरोना संक्रमणबाट मृत्यु भइसकेको छ ।
