पर्वतको बिहादीमा शिक्षक माथि जनप्रतिनिधिको अभद्र व्यवहार, बाटो ढुकेरै शिक्षक कुटियो
पर्वत । पर्वत जिल्ला विहादी गाँउपालिका अन्तर्गतको नेपाल तारा मावि रानीपानीमा विद्यालयको विविध विषयमा छलफल गर्न बोलाईएको विव्यस बैठकमै जनप्रतिनिधिबाट प्रधानाध्यापकमाथि अभद्र व्यवहार भएको छ ।
वडासदस्य धन बहादुर क्षेत्रीले आफूलाई किन बैठकमा छुट्टै नबोलाएको भन्दै प्रअ कुल प्रसाद पराजुलीमाथि बैठकमै अभद्र व्यवहार गरेका हुन् ।
‘वडाध्यक्ष विव्यसको पदेन सदस्य रहने भएकाले बैठकमा उहाँलाई निमन्त्रणा गरिएको थियो । उहाँले वडासदस्य पठाउनुभएछ’– प्रअ पराजुलीले एजुकेशनपाटीसँग भने– ‘मलाइ नै किन निमन्त्रणा गरिनस् भन्दै वडासदस्य आएर म माथि दूव्र्यवहार गर्न थाल्नुभयो ।’
विव्यसमा अभिभावकका ४ जना र वडाअध्यक्ष पदेन सदस्य रहने व्यवस्था भएपनि खासमा बैठकको अध्यक्षता कसले गर्नेमा विवाद देखिएको पराजुलीले जानकारी दिए ।
वडाध्यक्षले आफ्नो अध्यक्षतामा बैठक सञ्चालन हुनुपर्ने र अभिभावकहरुले जेष्ठ सदस्यको अध्यक्षतामा बैठक हुनुपर्ने अडान राखेको उनले बताए ।
‘यसरी लामो समय बैठक बस्न नसकेपछि जे त होला भनेर बैठक डाकिएको थियो । बैठकमा अध्यक्षता गर्न नपाउने भएपछि वडाध्यक्ष आफु नआएर अर्का वडासदस्य पठाउनुभयो । उहाँ आएर बैठकमै हाहल्ला गर्नुभयो ।’ पराजुलीले भने ।
यस्तै जिल्लाकै विहादी गाँउपालिका अन्र्तगतको आम्बारी माविमा कार्यरत शिक्षक कृण्ण ढकाललाई विधालयमा विद्यालय व्यवस्थापन समितीको गठन प्रक्रियाको विषयलाई लिएर बाटो ढुकेरै कुटपिट भएको छ ।
शुक्रवार घरबाट गाँउमा छिमेकीको घर जादै गर्दा बाटो कुरेर सोही स्थानका गणेश पराजुली र विमल पराजुलीले मोटरसाइकल रोकी कुटपीट गर्दा शिक्षक ढकाल गम्भीर घाइते भएका छन् ।
विव्यसमा दलगत प्रतिनिधित्वको कुरालाई लिएर शिक्षक माथि बाटो ढुकेरै कुटपिट गरी गम्भिर घाइते बनाइएको हो ।
घटनापछि कुटपिट गर्ने विरुद्ध जिल्ला प्रशासन कार्यालय र जिल्ला प्रहरी कार्यालयमा किटानी जाहेरी दिइएको शिक्षक ढकालले जानकारी दिए ।
इता, शिक्षकहरु माथि जनप्रतिनिधि एवं अन्यपक्षबाट भएको अभद्र व्यवहार तथा कुटपिटको घटना प्रति नेपाल राष्ट्रिय शिक्षक संगठन पर्वतले निन्दा गरेको छ ।
शनिवार संगठनका जिल्ला अध्यक्ष चिरञ्जिवी अधिकारी र सचिव सुरेन्द्र शर्मा गौतमले प्रेस विज्ञप्ति जारी गर्दै शिक्षकमाथि जनप्रतिनिधि एवं अन्य व्यक्तिबाट भएको अभद्र व्यवाहारको घोर निन्दा गरेको हो ।
संगठनका अध्यक्ष अधिकारीले शिक्षकमाथि भएको आक्रमणको घोर निन्दा एवं भत्सर्ना गर्दै दोषी उपर कडा कारवाहीको माग गरेका छन् ।
अधिकारीले दुवै घटनाका कारण समग्र शिक्षा क्षेत्र र शिक्षक माथि गरिएको व्यावहारका दोषिहरुलाई कडा कारवाही नगरिए हामी शिक्षकहरु कारवाहीको मागको लागि जस्तो सुकै परिस्थितिमा पनि पछि नहट्ने चेतावनी र चुनौति दिए ।
घटना लगत्तै उक्त गाउँपालिका भरिका शिक्षकहरुले विरोध स्वरुप हातमा कालो पट्टी बाँधेर काम गरिरहेकासमेत अध्यक्ष अधिकारीले एजुकेशनपाटीलाई बताए ।
उनले घटनाका दोषिउपर तत्काल कार्बाही प्रक्रिया अगाडि नबढाए संगठनले जस्तोसुकै संघर्षको कार्यक्रम घोषणा गर्न तयार रहेको चेतावनी दिए ।
