पर्वत प्रहरीको सक्रियता- भंगारामा अन्तरकृया, शहीदमा बिपद् न्युनीकरण सम्बन्धी सचेतना कार्यक्रम
पर्वत / जिल्ला प्रहरी कार्यालय पर्वतले समुदाय–प्रहरी साझेदारी कार्यक्रम अन्तरगत जिल्लाका बिभिन्न ठाउँहरुमा अन्तरकृया र सचेतना कार्यक्रम सञ्चालन गरेको छ ।
प्रहरीले फलेबास नगरपालिका– ९ भंगारामा शान्ति सुरक्षा तथा समसामयिक विषयमा अन्तरक्रिया कार्यक्रम सम्पन्न गरेको छ भने कुस्माको शहीदस्मारक आवासिय माबिमा बिपद् न्युनीकरण सम्बन्धी सचेतनामुलक कार्यक्रम सम्पन्न गरेको हो ।
भंगारामा भएको कार्यक्रममा जिल्ला प्रहरी कार्यालय पर्वतका प्रमुख डिएसपी श्यामु अर्यालले जिल्लाको शान्ति सुरक्षाको अबस्था र समाजमा हुने अपराधिक घटना हुन नदिन समुदायको भूमिका बिषयमा बोल्नुभएको थियो । उहाँ पर्वतमा ठुला अपराधिक घटना नभए पनि मदिरा सेवन र घरेलु हिंसाका घटना बढी भएकाले समुदायले नै यस्ता घटना न्युनीकरणका लागि जनचेतनामुलक कार्यक्रमहरु सञ्चालन गर्न जरुरी भएको बताउनुभयो । उहाँले प्रहरीले अपराधिलाई कुनै पनि हालतमा दबाब र प्रभाबका आधारमा छाड्न नसकिने बताउँदै घटना हुनै नदिन समुदाय सचेत हुनुपर्छ भन्नुभयो ।
फलेबास नगरपालिका वडा नं ९ का वडा अध्यक्ष गंगाधर शर्माले शान्ति सुरक्षा र सामाजिक सद्भाव कायम गर्ने बिषयमा जनप्रतिनिधीहरु प्रहरी संग सहकार्य गरेर अघि बढ्न सधै तयार रहेको छ भन्नुभयो ।
भंगारा प्रहरी चौकीमा भएको कार्यक्रममा प्रहरी चौकी भंगराका ईन्चार्ज प्रहरी हवल्दार राजेन्द्र बस्नेत लगायतले आफ्ना धारणा राख्नुभएको जिल्ला प्रहरी कार्यालय पर्वतले जानकारी दिएको छ ।
यसैगरी समुदाय–प्रहरी साझेदारी कार्यक्रम अन्तर्गत कुश्मा नगरपालिका वडा नं. ६ स्थित शहिदस्मारक अवासिय माबिमा जिल्ला प्रहरी कार्यालय पर्वतको आयोजना र डिभिजन वन वन कार्यालय पर्वतको सकार्यक्रम विपद जोखिम न्यूनीकरण सम्बन्धी सचेतनामूलक प्रशिक्षण कार्यक्रम सम्पन्न भएको छ ।
विपद जोखिम न्यूनीकरणका लागि अन्तराष्ट्रिय दिवस २०७६ का अवसरमा सप्ताहव्यापी कार्यक्रम अन्तरगत कक्षा ८, ९ र १० का विधार्थीहरुलाई सचेतनामुलक प्रशिक्षण सम्पन्न गरिएको हो ।
विद्यालयका प्रिन्सीपल केशवराज पुरीको अध्यक्षतामा भएको कार्यक्रममा डिभिजन वन कार्यालय पर्वतका सहायक वन अधिकृत बिमला लम्साल र जिल्ला प्रहरी कार्यालय पर्वतका प्रहरी सहायक निरीक्षक अर्जुन पौडेलले विपदको जोखिमबाट बच्न अपनाउनुपर्ने साबधानिहरु तथा आवश्यक प्रथमिक उपचारका बारेमा सचेतनामुलक प्रशिक्षण दिनुभएको थियो।
