ब्राजिलका स्टार स्ट्राइकर नेइमार चोटका कारण प्रशिक्षणमा सहभागी हुन सकेका छैनन् । ब्राजिल रुस विश्वकप फुटबल अन्तर्गत शुक्रबार कोस्टारिकासँग हुने समूह चरणको आफ्नो दोस्रो खेलको तयारीमा छ ।

तर नेइमार सोमबार भएको प्रशिक्षणको क्रममा मैदानबाट खोच्याउँदै बाहिरिएका हुन् । उनको दायाँ खुट्टाको गोलीगाँठोमा समस्या देखिएको छ । २६ वर्षका नेइमार खुट्टा भाँच्चिएका कारण तीन महिना मैदान बाहिर रहेर विश्वकपअघि मात्रै मैदान फर्किएका थिए ।

समूह चरणको स्वीट्जरल्याण्डसँगको पहिलो खेलमा विपक्षी खेलाडीले गरेको फउलका कारण नेइमार चोटग्रस्त भएका हुन् । उनको दायाँ गोलीगाँठोको अहिले उपचार भइरहेको छ ।

आइतबार भएको पहिलो खेलमा ब्राजिल स्वीट्जरल्याण्डसँग १–१ को बराबरीमा रोकिएको थियो । ब्राजिलियन टिमका प्रवक्ता विनिकिउस रोड्रिग्वेजले नेइमारले पीडा महसुस गर्ने बित्तिकै उनलाई प्रशिक्षणबाट बाहिर निकालिएको बताए ।

नेइमारलाई अहिले टिमका फिजियोले हेरिरहेका छन् । उनी एक दिनपछि प्रशिक्षणमा फर्किने छन् । गएको फेब्रुअरीमा नेइमारको दायाँ खुट्टा नै भाँच्चिएको थियो ।