पर्वतको शंकरपोखरीमा कम्युनिष्ट पार्टीका उपाध्यक्षको हत्या
पर्वत । पर्वतको फलेवास नगरपालिका ३ शंकरपोखरीमा कम्युनिष्ट पार्टीका वडा कमिटी उपाध्यक्षको हत्या भएको छ । तत्कालिन नेकपा(एमाले) का वडा कमिटी उपाध्यक्ष सूर्यबहादुर सुनारको आफ्नै घरको अग्लोले हानेर हत्या गरिएको हो । सुनचाँदी ब्यबसाय समेत गर्दै आएका गोपाल भनेर बोलाउने सुनारलाई फलेवास २ थापाठानाका बिनोद कुँवर र उनकी श्रीमती राधिका कुँवरले ढोकाको आउलोले हानेर हत्या गरेका छन ।
शुक्रबार दिउँसो सामान्य भनाभनको क्रममा कुँवर दम्पतीले सुनारलाई टाउकोमा आउलोले हानेका थिए । प्रत्याक्षदर्शीका अनुसार रक्सी खाएर हल्लाखल्ला गरेका कुँवर दम्पत्तीले अपशब्द बोलेका थिए । अपशब्द बोलिरहेका कुँवरलाई सुनारले यसे नबोल्न भनेपछि हातपातमा उत्रिएको प्रहरीले अनुसन्धान बाट थाहा भएको जनाएको छ ।
चोट लागेर उपचारका लागि पोखराको मणिपाल अस्पताल पोखरा लगेकोमा उपचारकै क्रममा सुनारको मृत्यु भएको हो । सुर्यबहादुर सुनारकी श्रीमती पनि आक्रमणमा घाईते भएकी छिन् । श्रीमती सरस्वती सुनारको पनि अहिले अस्पतालमा उपचार हुदै छ ।
आक्रमणकारी बिनोद बिक्रम कुवँंर र राधिका कुँवरलाई प्रहरीले नियन्त्रणमा लिएको छ । रक्सीको नशामा रहेका कुँवरले आफुले रिस उठेपछि आक्रमण गरेको प्रहरी समक्ष बताएका छन् । यस सम्बन्धि शनिबार प्रकाशित समाचार बिबरण फरक परेकोमा सच्चाइएको छ ,सम्पादक।
