प्रदेश सभामुख अधिकारीलाई महराद्वारा स्वास्थ्यलाभको कामना

काठमाडौं/संघीय संसदका सभामुख कृष्णबहादुर महराले प्रदेश नम्बर ४ का सभामुख नेत्रनाथ अधिकारीको स्वास्थ्य अवस्था बुझ्नुभएको छ ।

महराले ललितपुरको भैंसेपाटीमा रहेको मेडिसिटी हस्पिटल पुगेर प्रदेश सभामुख अधिकारीको स्वास्थ्य अवस्था बुझ्नुभएको हो । शौचालयमा लडेर घाइते हुनुभएका प्रदेश सभामुख अधिकारीलाई महराले स्वास्थ्य लाभको कामना गर्नुभयो ।

डाक्टरहरुले खतरामुक्त भएको बताएको भन्दै अधिकारीलाई महराले आफूहरु साथमा रहेको भन्दै नआत्तिन आग्रह गर्नुभयो । उपचारमा सक्रिय डाक्टरहरुले अधिकारी खतरामुक्त रहेको र उपचार चलिरहेको सभामुख महरालाई बताएका थिए ।

सभामुख महराले अधिकारीको उपचारमा कुनै कसर बाँकी नराख्न अस्पताल प्रशासनलाई आग्रह गर्नुभएको छ । सभामुख महरासँगै उपसभामुख शिवमाया तुम्बाहाम्फे पनि अस्पताल पुग्नुभएको थियो ।