संसदको मुठभेड आजका लागि टर्यो, मंगलबार सम्मका लागि संसद स्थगित

काठमाडौं । प्रमुख राजनीतिक दलहरुबीच संसदको गतिरोध अन्त्य गर्ने विषयमा कुनै सहमति नभएपछि सोमबार ४ बजे लागि दोस्रो पटक बोलाइएको संसद बैठक स्थगित गरिएको छ । सोमबार १ बजेको संंसद बैठक प्रमुख प्रतिपक्षी एमालेलगायतका दलहरुले अवरुद्व गरेपछि संसद खुलाउन कार्यव्यवस्था समितिको बैठक बोलाइएको थियो । सो बैठकमा पनि कुनै सहमति जुट्न नसकेपछि सूचना टाँस गरेर पुस १९ गते मंगलबार १ बजे लागि बैठक बोलाइएको सभामुखका प्रेस सल्लाहाकार बबिन शर्माले जानकारी दिए ।
सभामुखले मंगलबार ११ बजे संसद अवरुद्व खुलाउन तीन दलका शीर्ष नेताहरुको बैठक बोलाएको शर्माले बताए ।
सरकारले संविधान संशोधन प्रस्ताव संसद सचिवालयमा दर्ता गराएपछि प्रतिपक्षी नेकपा एमालेले संसद बैठक नियमित अवरुद्व गर्दै आएको  छ । संसद बैठक नबस्दा अख्तियारका निलम्बित प्रमुख आयुक्त लोकमान सिंह कार्की विरुद्वको महाभियोग प्रस्ताव, निर्वाचन विधेयक माथिको छलफल समेत हुन सकेको छैन ।