तीन सांसदलाई अख्तियारको ‘क्लिन चिट’

काठमाडौं । गैरकानुनी सम्पत्ति आर्जन (अकुत) को उजुरीमा छानबिनपछि अख्तियार दुरुपयोग अनुसन्धान आयोगले तीन सांसदलाई सोमबार क्लिन चिट दिएको छ ।
अख्तियार स्रोत अनुसार सांसदहरु उमेश श्रेष्ठ, बाबुराम पोखरेल र जनार्दन ढकाललाई बारबाही नचल्ने गरि उनिहरुविरुद्ध उजुरी तामेलीमा राख्ने निर्णय भएको हो ।
तीनै जना सांसदले अकुत सम्पत्ति आर्जन गरेको भन्दै उजुरी परेपछि अख्तियारमा छानबिन चलिरहेको थियो । “छानबिनबाट सम्पत्तिको स्रोत पुष्टि हुने आधार देखियो । मुद्धा चल्ने अवस्था नभएपछि कानुनअनुसार तामेलीमा राख्ने निर्णय भएको हो,” स्रोतले भन्यो ।
लिटिल एन्जल्स स्कुलका अध्यक्ष रहेका श्रेष्ठ कांग्रेसका समानुपातिक सांसद हुन् । यस्तै भिएस निकेतनका अध्यक्ष बाबुराम पोखरेल मधेसी जनअधिकार फोरम लोकतान्त्रिक र रसुवा एमालेका तत्कालिन अध्यक्ष ढकाल एमालेका सांसद हुन् ।यो समाचार आजको अन्नपुर्णपोष्ट दैनिकले छापेको छ ।