तीन करोड लगानीमा गाउँमै बाख्रापालन फारम

पर्वत/युवाहरु रोजगारका लागि बिदेश पलायन हुने क्रम बढ्दो छ । अहिले पनि दैनिक युवाहरु गाउँ छाड्दै रोजगारीको नाममा बिदेशिएका छन् । युवाहरुको पलायनले पर्वतका कतिपय गाउँ रित्तिने अवस्थामा पुगेका छन् ।
गाउँमै पनि स्वरोजगार मुलक उद्योग, कृषि, पशुपालनबाट पनि राम्रो आम्दानी गर्न सकिन्छ भन्ने सोचाई युवामा पटक्कै पाइँदैन । यसले गर्दा विगतमा राम्रो कृषिजन्य बस्तु उत्पादन हुने खेतीयोग्य जमिनहरु धमाधम बाँझिन थालेका छन् । यसको प्रत्यक्ष प्रभाव स्वरुप गाउँगाउँसम्म अन्नबाली आयात हुने क्रम बढेको छ ।
विगतमा कोदो, मकै उत्पादन भइ ढिँडो, रोटी खाने गरिएपनि अहिले त्यो छाडेर चामलको प्रयोग ब्यापक छ । शहरदेखि गाउँसम्म युवाहरु रोजगारीको नाममा पलायत हुँदा नकारात्मक प्रभावहरु देखिन थालेका छन् ।
यो समयमा होश्राङ्दीको पैञ्यु गोल्र्याङ वहुउद्देश्यीय कृषि फर्म प्राली सबैको सिकाईको पाठशाला बन्ने दिशामा अग्रसर भएको छ । कृषि र पशुपालनमा ध्यान नदिँदा त्यसमा अहिलेसम्म ठुलो लगानी हुन नसकिरहेको अवस्थामा उक्त बहुउदेश्यीय फर्मले तीन करोड ३१ लाख रुपैयाँको लागतमा नमुना कृषि फर्म सञ्चालनमा ल्याएको छ ।
फर्मले पशुपन्क्षी मन्त्रालय अन्र्तगत रहेको व्यवसायिक कृषि तथा व्यापार आयोजनासंग फर्ममा आधारीत बाख्रा पालन सम्झौता गरी अहिले एक सय पाँच वटा माउँबाख्रा पाल्न सुरु गरेको छ । यो आयोजनामा कुल तीन करोड ३० लाख ९७ हजार पाँच सय १७ रुपैयाँ खर्च हुने फर्मका अध्यक्ष रुद्रबहादुर क्षेत्रीले जानकारी दिए ।
उनका अनुसार उक्त रकम मध्ये व्यावसायिक कृषि तथा व्यापार आयोजनाले ९९ लाख २९ हजार छ सय आठ रुपैयाँ व्यहोर्ने भएको हो । वाँकी रकम दुई करोड ३१ लाख ६७ हजार नौ सय नौ रुपैयाँ शेयर सदस्यहरुले लगानी गर्ने भएको उनले बताए ।
२०१७ को डिसेम्वर ३१ भित्र सवै काम सम्पन्न गरी सक्नुपर्ने उक्त आयोजनामा २५ मिटर लम्वाइ र पाँच मिटर चौडाईका तीन वटा गोठ त्यही आकारका गोदाम सहितका घाँस खाने ठाउँ निर्माण हुने छन् । फर्मको पहिलो पटक ब्यावसायिक कृषि तथा ब्यापार आयोजनाले अनुगमन गरी फर्केको फर्मका उत्प्रेरक एवम् शेयर सदस्य टिकाराम भुसालले जानकारी दिए । उनका अनुसार एकबर्षभित्र दुई सय र तीन बर्षभित्रमा पाँच सय माउँबाख्रा पालन गरी बाख्राको स्रोत केन्द्रको रुपमा पहिचान बनाउने योजना रहेको छ ।
‘पाँच सय माउ बाख्रा बनाएर यसक्षेत्रमै बाख्राको स्रोत केन्द्रका रुपमा पहिचान बनाउने हाम्रो योजना रहेको छ’ भुसालले भने । बाख्रापालनका लागि होश्राङ्दीमा तीन बर्षअघि नै चार सय रोपनी क्षेत्रफलमा घाँस रोपिएको थियो । ‘चार सय रोपनी क्षेत्रफलमा घाँस तीन बर्षअघि नै रोपिएको थियो, अब एक सय रोपनी थप गर्ने तयारीमा छौ उत्प्रेरक भुसालले भने ।
उक्त फर्ममा अहिले छ जनाले रोजगारी पाइसकेका छन् । फर्ममा बाख्रा थप गर्दै जाँदा थप युवाले रोजगारी पाउनेछन् । फर्ममा अहिले १५ वटा बकेर्ना पाडापाडी समेत रहेका छन् । बाख्रासँगै पाडापाडी समेत पाल्ने फर्मले जनाएको छ ।
पशुपन्क्षी मन्त्रालय अन्र्तगतको ब्यावसायिक कृषि तथा ब्यापार आयोजनामा पर्वतका तीन वटा फर्म मिलेर प्रस्ताव गरेका थिए । त्यसअन्र्तगत होश्राङ्दीमा एक करोड, त्रवेणीमा एक सय वटा बाख्रापालन गर्न ३५ लाख र कुश्मा नगरपालिकास्थित सिल्मीमा मोदीकाली फर्मलाई ३५ लाख रुपैयाँ अनुदान प्राप्त भएको छ ।