भैरहवामा विशाल प्रदर्शन, एकसातादेखि जारी रुपन्देही बन्द फिर्ता
रुपन्देही २१ मंसिर – पाँच नम्बर प्रदेशबाट पहाडी जिल्ला टुक्र्याउनेगरी सरकारले ल्याएको संविधान संशोधन विधेयकको बिरोधमा एकसाता देखि जारी रुपन्देही बन्द मंगलवारदेखि फिर्ता भएको छ ।
रुपन्देहीमा बन्द आह्वान गरेका नेकपा एमाले, नेकपा माले, राष्ट्रिय जनमोर्चा लगायतका दलले मंगलवार संयुक्त विज्ञप्ती प्रकाशित गरी तत्कालका लागि बन्द फिर्ताको घोषणा गरेका हुन् ।
मंसिर २६ गते सम्मका लागि बन्द र हडतालका कार्यक्रम फिर्ता गरी आन्दोलनको स्वरुप परिवर्तन गरिएको नेकपा एमालेका जिल्ला अध्यक्ष शिवराम सुवेदीले जानकारी दिए ।
आन्दोलनरत दलहरुले संसद सचिवालयमा दर्ता भएको संविधान संशोधन विधेयक संसदमा टेबल भएमा आन्दोलन फेरि सशक्त बनाउने चेतावनी दिएका छन् । विधेयकको बिरोधमा गएको शुक्रवार रुपन्देहीको बुटवलमा अहिले सम्मकै सशक्त प्रदर्शन भएको थियो ।
संशोधनको बिरोधमा मंगलवारपनि रुपन्देहीको बुटवल, मणिग्राम लगायतका ठाउँमा प्रदर्शन भएका थिए । यसअघि सोमबार पाल्पाको तानसेन, गुल्मीको तम्घास, अर्घाखाचीको सन्धीखर्क लगायतका स्थानमा प्रदर्शन भएका थिए ।
यसैबीच, प्रदेश नम्बर पाँचलाई टुक्र्याउने निर्णयको बिरोधमा रुपन्देहीको भैरहवामा विशाल प्रदर्शन भएको छ । सिंद्धार्थ उद्योग वाणिज्य संघको आयोजनामा भएको प्रदर्शनमा हजारौ सहभागि भएका थिए । प्रदर्शनमा स्थानिय राजनीतिक दलका कार्यकर्ताको बाक्लो उपस्थिती रहेको थियो ।
