ब्राजिलको फुटबल टिम बोकेको विमान कोलम्बियामा दुर्घटनाग्रस्त हुँदा ७६ को मृत्यु, ५ को जीवितै उद्दार
काठमाडौं । ब्राजिलको एक फुटबल क्लबका खेलाडी बोकेर कोलम्बियाको मेडेल्लिन अन्तर्राष्ट्रिय एयरपोटतर्फ गइरहेको एक विमान दुर्घटनाग्रस्त हुँदा ७६ जनाको मृत्यु भएको छ ,
समाचारसंस्था सीएनएनले जनाएअनुसार ७२ जना यात्री र ९ जना चालक दलका सदस्य सहितकोे उक्त चार्टर बिमान बोलिभियाको भिरु भिरु एयरपोर्ट बाट मेडेल्लिन अन्तराष्ट्रिय एयरपोटतर्फ गइरहेको थियो ।
समाचारमा जनाइएअनुसार कोलम्बियाको मेडेलिन अन्तर्राष्ट्रिय विमानस्थलका नजिकै रियोनेग्रो भन्ने स्थानमा दुर्घटनामा परेको कोलम्बियाको नागरिक उड्डयन प्राधिकरणले बताएको छ ।
विमान दुर्घटनामा ५ जना बाँच्न सफल बताइएको छ ।
नागरिक उड्डयन प्राधिकरणले सुरुमा तीन जना खेलाडी, दुई चालक दलको सदस्य र एक पत्रकार बाँच्न सफल भएको बताइए पनि एक जनाको उपचारको क्रममा मृत्यु भएको बताइएको छ ।
स्थानीय सञ्चारमाध्यमका अनुसार कोलम्बियाको एटलेटिको न्यासियनल क्लबसँग कोपा सुदामेरिकाना फाइनल खेल खेल्न ब्राजिलको चापेकोइन्से टिम उक्त विमानमा यात्रा गर्दै थियो । उक्त खेल बुधबार मेडेल्लिनमा खेल्ने कार्यक्रम थियो ।
