मृतक पौडेलको परिवारलाई ग्राहक दुर्घटना विमा

पर्वत/पर्वत सदरमुकाम कुश्माबजारमा सञ्चालित देव विकास बैंकले दुर्घटनामा परी ज्यान गुमाएका मृतक ग्राहकको परिवारलाई दुर्घटना विमा प्रदान गरेको छ । सोमबार एक कार्यक्रमको आयोजना गरी बैंकको शाखाले विमा स्वरुपको रकम मृतक सन्तोष पौडेलको परिवारलाई हस्तान्तरण गरेको हो ।
शाखा कार्यालय पर्वतका प्रबन्धक केदारनाथ आचार्यले दिएको जानकारी अनुसार बैंकका निक्षेप कर्ता पकुवा ७ पर्वत घर भई हाल कुश्मा नगरपालिका ११ मा बसोबास गर्दै आएका मृतक सन्तोष पौडेलको परिवारलाई विमा स्वरुपको रु १ लाख रकम चेकमार्फत प्रदान गरेको हो । रोट्याक्ट क्लव अफ पर्वतका अध्यक्ष समेत रहेका पौडेलको गत जेठ २८ गते मोटरसाइकल दुर्घटनामा परी ज्यान गएको थियो । पोखरा बाग्लुङ्ग राजमार्गको हेम्जामा ग १ ख ४३५४ को टिप्परले ध १ प १९४७ को मोटरसाईकल लाई ठक्कर दिदा पौडेलको मृत्यु भएको थियो ।
सोमबार जिल्ला प्रशासन कार्यालय पर्वतमा प्रमुख जिल्ला अधिकारी शम्भुप्रसाद मरासेनी मार्फत मृतक पौडेलकी धर्मपत्नी सर्मिला बराललाई उक्त रकम चेकमार्फत हस्तान्तरण गरिएको हो । यस अघि शाखा स्थापना पश्चात् कुश्मा बजारकै मृतक राजन पौडेलको परिवारलाई दुर्घटना विमा बापतको रकम १ लाख रुपैँया बैंकले प्रदान गरेको थियो ।