एनसेलले ल्यायो ‘मोबाइल टिभी प्याक’, अब सुलभ शुल्कमा अनलाइन टिभी हेर्न सकिने
October 27, 2016 | 6:06 pm
काठमाडौं । मोबाइल सेवा प्रदायक कम्पनी एनसेलले आफ्ना ग्राहकका लागि ‘मोबाइल टिभी प्याक’ ल्याएको छ । चाडपर्वको अवसरमा ल्याइएको यो प्याक अन्तर्गत एनसेलका सम्पूर्ण प्रिपेड तथा पोस्टपेड ग्राहकले अब सुलभ शुल्कमा आफ्नै मोबाइलमा अनलाइन टिभी हेर्न सक्नेछन् ।
नेपाली दूरसञ्चार क्षेत्रको इतिहासमा नै पहिलो पटक टिभी प्याक जस्तो नयाँ सेवा सुरु गर्दै एनसेलले एउटा कोसेढुंगा स्थापना गरेको छ । यो प्याक सुचारु गर्ने ग्राहकले नेट टिभी एपमार्फत अनलाइन टिभी हेर्न सक्नेछन् । नेट टिभी, एनआईटिभी स्ट्रिम्ज् प्रा.लिको प्रोडक्ट हो र एनसेलले एनआईटिभी स्ट्रिम्ज्सँग यो मोबाइल टिभी सेवाको लागि सहकार्य गरेको छ ।
यो मोबाईल टिभी प्याक बुधबारदेखि १५ दिनको लागि सञ्चालनमा आएको छ । एनसेलका ग्राहकले आफ्नो आवश्यकता अनुसार ३० मिनेट, १ घण्टा, २ घण्टा र ३ घण्टाको टिभी प्याक खरिद गरि नेट टिभी एप प्रयोग गर्न सक्नेछन् । ३० मिनेटको प्याकको शुल्क रु ३५ तोकिएको छ । १ घण्टाको प्याकको रु ६० पर्दछ भने २ घण्टा र ३ घण्टा प्याकको मूल्य क्रमशः रु १०० रु १५० निर्धारण गरिएको छ । प्याकका शुल्कमा कर समाबेश गरिएको छ ।
यी चारै वटा प्याकहरु ग्राहकले प्रत्येक पटक प्याक खरिद गर्नुपर्ने वा सेवा प्रयोगको अवधि सकिएपछि स्वतः नवीकरण हुने दुई किसिमबाट यो सेवा सुचारु गर्न सक्छन् । प्रत्येक पटक लिन मिल्ने प्याक २४ घण्टाको लागि मात्र मान्य हुनेछ र स्वतः नवीकरण हुने प्याक हरेक मध्यरातमा स्वतः नवीकरण हुनेछ ।
प्याक खरिद गर्नका लागि ग्राहकहरुले एस्ट्रिक १७१३३ ह्यास डायल गरि आफ्नो आवश्यकता अनुसारको प्याक खरिद गर्न सक्नेछन् । १७१३३ मा एसएमएस पठाएर पनि ग्राहकले यी प्याकहरु खरिद गर्न सक्छन् । उदाहरणका लागि प्रत्येक पटक लिन मिल्ने १ घण्टाको प्याक खरिद गर्नका लागि ग्राहकले अंग्रेजीमा १ स्पेस अंग्रजीको सानो अक्षरमा एचआर स्पेस अनि अंग्रजीमा ठूलो डी टाइप गरी १७१३३ मा एसएमएस पठाउन सक्छन् । त्यस्तै स्वतः नवीकरण हुने प्याक लिनका लागि अंग्रेजीमा १ अनि स्पेस नछोडी अंग्रजीको सानो अक्षरमा एचआर टाइप गरि १७१३३ मा पठाएर प्याक सुचारु गर्न सक्छन् ।
‘‘मोबाइल टिभी सेवामा सुलभ पहुँच सुनिश्चित गर्दै ग्राहकका लागि यो नयाँ सेवा ल्याउन पाएकोमा हामी निकै खुसी छौं,’’ एनसेलका कर्पोरेट संवाद विज्ञ मिलन शर्माले भने, ‘‘मोबाईल डेटा सेवा र कन्टेन्ट दुवैको माग बढिरहेको बेलामा, ग्राहकले मोबाइल तथा टिभी दुवै सेवा एकीतृत रुपमा लिन सक्ने हुँदा यसले ग्राहकलाई थप मूल्य प्रदान गर्नेछ ।”
