चितामा राख्न लागिएको शव प्रहरी नियन्त्रणमा
October 20, 2016 | 8:13 pm
फाइल तस्बिर
धनगढीः मोहना नदी घाटमा अन्तिम संस्कारका लागि चितामा राख्न लागिएको एक शव बिहीबार प्रहरीले नियन्त्रणमा लिएको छ ।
जिल्ला प्रहरी कार्यालय कैलालीले हत्या गरिएको उजुरी आएपछि शव नियन्त्रणमा लिई परीक्षणका लागि सेती अञ्चल अस्पताल धनगढी पुर्याइएको जनाएको छ ।
धनगढी उपमहानगरपालिका–२ का अन्दाजी ४१ वर्षीय नारायण उपाध्याय बिहान घरको कोठामा मृत फेला परेका थिए ।
अन्तिम संस्कार गर्न शव मोहना नदी घाटमा पुर्याइँदा मृतकको मुख, नाक, कानबाट रगत बगेको देखिएपछि आफन्तले प्रहरीलाई उजुरी दिएका थिए ।
घटनाको अनुसन्धानका लागि मृतकका श्रीमती र सालालाई नियन्त्रणमा लिइएको जिल्ला प्रहरी कार्यालयका प्रमुख प्रहरी उपरीक्षक राजेन्द्र विष्टले बताए । रासस
