कोरियामा हुण्डीमा संलग्न एक नेपाली पक्राउ

काठमाडौं, असोज २६ – दक्षिण कोरियाबाट पैसा अवैध रुपमा हुण्डी गरेर पठाउने काममा संलग्न एक नेपालीलाई कोरिया प्रहरीले पक्राउ गरेको छ । हुण्डी गरेर पैसा पठाउने काममा संलग्न दुई जना पक्राउ परेकोमा एकजना नेपाली रहेको कोरियाली समाचार संस्था द कोरिया टाइम्सले जनाएको छ । पक्राउ पर्नेको नाम उल्लेख नगरिएपनि उनी वैदेशीक रोजगारीका लागि कोरिया पुगेका नेपाली रहेको उल्लेख छ । पक्राउ परेका अर्का नागरिक भने चिनियाँ विद्यार्थी हुन् । उनीहरु मिलेर गएको ५ वर्षमा साढे ४० लाख भन्दा बढी रकम कोरियाबाट नेपाल पठाएको कोरियाको प्रान्तीय प्रहरी कार्यालयले जनाएको छ ।
कोरियामा रहेका झण्डै ३५ सय नेपाली कामदारबाट नेपालमा पैसा पठाइदिनका लागि आफूहरुलाई आग्रह गरिएको र त्यसै अनुरुप पैसा पठाएको उनीहरुले बताएको खबरमा उल्लेख छ ।
उनीहरुले नेपालीले घर पठाउन दिएको पैसाबाट कोरियाली सौन्दर्य सामग्री किनेर चिनियाँ दलालमार्फत चीनमा बेच्ने र त्यसबाट आएको पैसा नेपाल पठाउने गरेको खुलेको हो । यो क्रममा साढे ४० लाख भन्दा बढि पैसा अवैध रुपमा नेपाल पठाइएको प्रहरीको भनाई छ ।