मोटरसाइकल दुर्घटनामा बुवाको मृत्यु, छोरा घाइते

गोरखा, असोज २६ – गोरखामा बुधबार भएको मोटरसाइकल दुर्घटनामा एक जनाको ज्यान गएको छ । आबुखैरेनी–गोरखा सडकखण्ड अन्तर्गत ५ किलो भन्ने ठाउँमा दिउँसो भएको दुर्घटनामा गोरखाको देउराली–९ का ४५ वर्षका शरण पन्थको ज्यान गएको हो ।

आँबुखैरेनीबाट गोरखा आउँदै गरेको बा ४१ प ३५३३ मोटरसाइकल र गोरखा बजारबाट आँबुखैरेनी जाँदै गरेको ग ८ प ६५७१ नम्बरको स्कुटर ठोक्किएर दुर्घटना भएको प्रहरीले जनाएको छ ।

मोटरसाइकलको पछाडी बसेका पन्थको टाउकोमा गम्भीर चोट लागको र उपचारका लागि काठमाडौं लैजाने क्रममा बाटोमै ज्यान गएको जिल्ला प्रहरी कार्यालय गोरखाले जनाएको छ ।

दुर्घटनामा मोटरसाइकल चालक २१ वर्षका सुनिल पन्थ सामान्य घाइते भएका छन् । सुनिल शरणका छोरा हुन् । स्कुटर चालक गोरखा नगरपालिका–६ की मिना केसीसहित त्यसमा सवार तीनजनाको अवस्था भने सामान्य रहेको प्रहरीले जनाएको छ ।