उरुग्वे र कोलम्बियाको बराबरी
बोगोटा । रुसमा हुने सन् २०१८ को विश्वकप फुटबलको छनोट खेलमा उरुग्वे र कोलम्बिया बराबरी खेलेका छन् । विश्वकपको दक्षिणी अमेरिकी छनोटअन्तर्गत बुधबार बिहान भएको खेलमा उरुग्वे र कोलम्बियाले २ – २ गोलको बराबरी खेलेका हुन् ।
कोलम्बियाको घरेलु मैदानमा भएको खेलमा १५ औं मिनेटमा एबेल एगुइलिरले गोल गर्दै कोलम्बियालाई सुरुवाति अग्रता दिलाए । प्रतिस्प्रधात्मक बनेको खेलको २७ औं मिनेटमा क्रिष्टिएन रोड्रिग्वेजले उरुग्वेका लागि बराबरी गोल फर्काए । पहिलो हाफमा १–१ को बराबरीमा सकिएको खेलको दोस्रो हाफमा भने उरुग्वेले अग्रता बनायो । ७३ औं मिनेटमा लुइस स्वारेजले गोल गर्दै उरुग्वेलाई २–१ को अग्रता दिलाए । तर, ८४ औं मिनेटमा कोलम्बियाका यरी मिनालेएक गोल फर्काएपछि खेल २–२ गोलको बराबरीमा सकियो ।
बराबरीसंगै उरुग्वेले दक्षिणी अमेरिकी छनोटमा २० अंक जोडेको छ र दोस्रो स्थानमा छ । कोलम्बिया १७ अंक जोडेर चौथो स्थानमा छ । यस्तै दक्षिणी अमेरिकी छनोट अन्तर्गत नै अर्को खेलमा इक्वेडर र बोलिभियाले पनि २–२ गोलको बराबरी खेलेका छन् ।
