भेनेजुएलामाथि ब्राजिलको सहज जित

मेर्डिया ।  रुसमा हुने सन् २०१८ को विश्वकप फुटबलको छनोट खेलमा ब्राजिलले भेनेजुएलालाई पराजित गरेको छ । विश्वकपको दक्षिणी अमेरिकी छनोट अन्तर्गत बुधबार बिहान भएको खेलमा ब्राजिलले भेनेजुएलालाई २ – ० ले पराजित गरेको हो ।

भेनेजुएलाको घरेलु मैदानमा भएको खेलमा ब्राजिललाई जित दिलाउन ग्राबियल जिसस र विलियनले एक एक गोल गरे । खेलको ५ औ मिनेटमा जिससको गोलबाट ब्राजिलले सुरुवाती अग्रता लिएको थियो । त्यसपछि दुवैतर्फबाट गोल गर्न नसक्दा पहिलो हाफमा ब्राजिलले १ – ० ले अग्रता बनायो । दोस्रो हाफमा ब्राजिलले थप एक गोल गर्यो । 

खेलको ५३ औ मिनेटमा विलयनले गोल गर्दै ब्राजिललाई सहज जित दिलाए । जितसंगै ब्राजिलले दक्षिणी अमेरिकी छनोटमा आफ्नो शिर्ष स्थान कायम राखेको छ । ब्राजिलले १० खेलबाट २१ अंक जोडेको छ र शिर्ष स्थानमा रहेको छ । दक्षिणी अमेरिकी छनोटको दोस्रो स्थानमा उरुग्वे र तेस्रो स्थानमा इक्वेडर रहेका छन् ।