भारतमा बालमृत्युदर संसारमै बढी
September 9, 2015 | 8:20 pm
नयाँ दिल्ली, भदौ २३ । भारतमा संसारकै सबैभन्दा बढी बालमृत्युदर रहेको पाइएको छ । युनिसेफले हालै सार्वजनिक गरेको एक तथ्याङ्कले सो अवस्था देखाएको हो ।
सन् २०१५ मा मात्र भारतमा करिब १५ लाख बालबालिकाको ज्यान गएको सार्वजनिक गरिएको प्रतिवेदनमा खुलाइएको छ ।
यो सङ्ख्या विश्वको बालमृत्युदरको करिब २० प्रतिशत नै हो– सो प्रतिवेदनमा भनिएको छ । पाँच वर्षमुनिका बालबालिकामध्ये भारतमा प्रति मिनेट करिब एकजनाको ज्यान जाने गरेको छ ।
विश्वव्यापी तथ्याङ्क हेर्दा सो प्रतिवेदनमा यस वर्ष विश्वका ५९ लाख बालबालिकाको मृत्यु भएको जनाइएको छ । कुपोषण, निमोनिय र झाडा, पखाला नै बालमृत्युको एक प्रमुख कारण हो । रासस/सिन्ह्वा
