‘७ प्रदेशबाट बढ्नु हुँदैन, वर्षमान र जनार्दन शर्माको सहभागितामा टीकापुर घटनाको योजना’
काठमाडौं, भदौ १३ । नेकपा एमालेका सचिव योगेश भट्टराईले अब ७ प्रदेशबाट माथि नजाने अडानमा रहनुपर्ने धारणा राखेका छन् ।
एमाले केन्द्रीय प्रचार विभागद्धारा आइतबार राजधानीमा आयोजित सञ्चारकर्मीसँगको छलफल कार्यक्रममा सचिव भट्टराईले एमालेको भदौ ९ गतेको स्थायी कमिटीको बैठकले अब प्रदेशका संख्या बढाउन नहुनेमा जोड दिएको बताउँदै यसबीचमा उठेका असन्तुष्टिका सवाललाई सम्बोधन गर्न प्रस्तावित प्रदेशका जिल्लालाई यताउता गर्न सकिने बताए ।
उनले आवश्यक पर्दा मुस्लिम, थारु, मधेसी वा जनजातिका संवैधानिक आयोग बनाउने विषयमा एमाले सकारात्मक भएको जानकारी दिए ।
‘संविधान निर्माण गरेर मुलुकलाई छिटो निकास दिनुपर्छ भन्ने सवालमा पार्टी इतिहासमै पहिलोपटक बढी एकीकृत भएको छ’–उनले भने ।
सचिव भट्टराईले अमेरिकी र पश्चिमा शक्तिले ‘नेपालमा टेकेर भारत र चीनलाई हेर्ने काम गरिरहेकाले संविधान निर्माणमा उनीहरुको पनि आफ्नो चासो रहेको’ बताउँदै ‘नेपाललाई छिन्न–भिन्नसहितको राष्ट्र मण्डल होइन, एकीकृत नेपाल बनाउने संविधान आवश्यक’ भएको बताए ।
उनले एमाओवादीका नेता वर्षमान पुन र जनार्दन शर्मासहितको सहभागितामा टीकापुरको हिंसात्मक घटनाको योजना बनाइएको आरोप लगाए ।
यसले एमाओवादीलाई अनिश्चिततातर्फ र मुलुकलाई अराजकतामा धकेल्ने उनको विश्लेषण छ ।
कार्यक्रममा एमालेका प्रचार विभागका उपप्रमुख सूर्य थापाले पार्टीले जनवर्गीय संगठनलाई अधिकारका सवालमा लड्न रोक नलगाएको तर नियन्त्रण बाहिर नजान भनेको स्पष्ट पारे । रासस
