निर्माण हुन लागेको नौ वर्ष पुग्यो तर बिजुली बलेन

जाजरकोट, ११ भदौ । जिल्लाको अर्छानी गाविस– ९ तम्तीमा बिजुलीको आयोजना निर्माण सुरु भएको नौ वर्ष पुग्यो । 

गाउँमा बिजुली बल्ने आशामा अर्छानी गाविसका ३५५ घर परिवारले दिन गन्न थालेको नौ वर्ष बितेपनि अहिलेसम्म बिजुली बल्ले कुनै सुरसार छैन ।
उक्त गाविसमा निर्माण हुन लागेको ३५.५० किलोवाट क्षमताको तिलिङ्गे खोला लघुजलविद्युत् आयोजना बन्दै नबनी अलपत्र परेपछि स्थानीयलाई अब बन्छ भन्नेमा शङ्का लागेको छ ।
निर्माणको जिम्मा लिएका सरोकारवाला आर्थिक अभावले आयोजना बन्न नसकेको बताउँछन् । आयोजनाका अध्यक्ष रणबहादुर शाही भौगोलिक विकटता र आवश्यक बजेटको अभावमा आयोजना निर्माणमा समस्या परेको बताउनुहुन्छ ।
उहाँले स्थानीयले श्रमदान नगर्दा विद्युत् बल्न नसकेको बताउनुभयो । अर्छानीे गाविसका ७, ८ र ९ मा बिजुली बत्ती बाल्ने गरी आयोजना सुरु गरिएको तर आवश्यक स्रोत नजुट्दा समस्या परेको शाहीको भनाइ छ ।
विसं २०६३ बाट निर्माण कार्य सुरु गरिएको योजना बन्न नसकेपछि महँगा उपकरणजन्य सामग्री खोला र खेतको आलीमा खिया लागेर बिग्रने अवस्थामा पुगेको स्थानीयवासी बताउँछन् ।
आयोजनाको कुल लागत रु दुई करोड ६६ लाख रहेको छ । आयोजना निर्माणका लागि वैकल्पिक ऊर्जाको रु एक करोड १० लाख ६२ हजार, जिल्ला विकास समितिको रु तीन लाख ७८ हजार र गाविसको रु दुई लाख २० हजार बजेट प्राप्त भइसकेको आयोजनाको उपभोक्ता समितिले जनाएको छ ।
रु एक करोड ७४ लाख सामान खरिदका लागि कम्पनीलाई दिएको रु आठ लाख ६५ हजार हेलिकप्टरबाट सामान ढुवानी गरेको र रु दुई लाख ४० हजार गाडीबाट सामान ढुवानी गरेको जानकारी समितिका अध्यक्ष शाहीले दिनुभयो ।
विभिन्न स्रोत र निकायबाट प्राप्त रकम सामग्री खरिद र ढुवानीमा सकिएपछि समस्या परेको उहाँको भनाइ छ । आयोजनाको काम लामो समयसम्म पूरा नहँुदा सामान विभिन्न ठाउँमा अलपत्र अवस्थामा रहे पनि सम्बन्धित निकायले चासो नदिएको स्थानीयवासीको गुनासो छ ।
आयोजनाका लागि रु ५० लाख अपुग रहेको भन्दै अध्यक्ष शाहीले जिविसको रु ३३ लाख र गाविसको रु २४ लाख अहिलेसम्म पाउन नसकिएको बताउनुभयो । रासस

सम्बन्धित समाचार

Comments are closed

भर्खरै view all

राष्ट्रिय सभाका अध्यक्ष तिमिल्सिना संग थाई नेपाली संघका पदाधिकारी भेट- गैह्र आवासीय नेपाली परिचयपत्र उपलब्ध गराउन पहलका लागि आग्रह

पर्वतका कुस्मा र फलेबास नगरपालिकाले ल्याउन सकेनन बजेट

ग्रामीण क्षेत्रलाई सुरक्षित राख्न गाउँ अभियानमा ट्राफिक

बन्दीपुरमा केबलकार-रोप परीक्षण र गोन्डोलामार्फत सामान बोकेर लोड परीक्षण

राष्ट्रिय सभाका अध्यक्ष तिमिल्सिना र चीनको जनकंग्रेसका अध्यक्ष बिच भेटवार्ता , ‘छेन्दु– पोखरा उडानका लागि चीन तयारी अवस्थामा’