टीकापुर घटनाका घाइते हवल्दार नेगीको निधन, मृतको संख्या नौ पुग्यो

काठमाडौँ, भदौ १० । गत सोमबार टीकापुर घटनामा घाइते भएका नेपाल प्रहरीका हवल्दार जनक नेगीको उपचारका क्रममा काठमाडौँमा निधन भएको छ । यससंगै टिकापुर घटनामा मृत्यु हुनेको सङ्ख्या ९ पुगेको छ ।

महाराजगञ्जस्थित प्रहरी अस्पतालमा हवल्दार नेगीको उपचारको क्रममा विहीवार राति २ बजे निधन भएको प्रहरीका प्रवक्ता कमलसिंह बमले जानकारी दिए । सेती अञ्चल प्रहरी कार्यालय गुल्ममा कार्यरत उनी सोमबार कैलालीको टीकापुरमा थरुहट आन्दोलनकारीको आक्रमणबाट गम्भीर घाइते भएका थिए । कञ्चनपुरको झलारी घर भएका नेगीको पार्थिव शरीर विहीवार उनको गृह जिल्ला पठाइने प्रहरीले जनाएको छ ।

यसअघि टीकापुरमा सीमाङ्कनको विषयलाई लिएर आन्दोलनकारीले निषेधाज्ञा तोडी अघि बढ्दा भएको झडपमा परी सात प्रहरी र एक नाबालकको ज्यान गएको थियो ।