राजधानीबाट १८ जना बन्दकर्ता पक्राउ, बन्दको प्रभाव सामान्य
फाइल फोटो
काठमाडौँ, भदौ ६ । नेपाल आदिवासी जनजाति महासंघले आह्वान गरेको बन्द गराउँदै हिँडेका महासंघका १८ कार्यकर्ता आइतबार बिहान पक्राउ परेका छन् ।
बालाजु चोकबाट १५, चाबहिल चोकबाट एक र ताल्सिखेल ललितपुरबाट दुई जनालाई पक्राउ गरिएको प्रहरीले जनाएको छ । पहिचानका आधारमा प्रदेशको सीमांकन गर्नुपर्ने, आदिवासी जनजाति आयोग गठन गर्नुपर्ने लगायत माग राखी बन्द आह्वान गरिएको हो ।
बन्दको सामान्य प्रभाव
विभिन्न राजनीतिक दलले संयुक्त रुपमा आइतबार आयोजना गरेको नेपाल बन्दका कारण काठमाडौँ उपत्यकाको जनजीवन सामान्य प्रभावित भएको छ । सवारी साधन सडकमा कम गुडेका छन् भने यात्रु पैदल हिँड्न बाध्य भएका छन् । अत्यावश्यक सेवामा प्रयोग हुने साधन भने सञ्चालनमा छन् ।
उपत्यकाबाट लामो दूरीका लागि छुट्ने भाडाका सवारीसाधन सञ्चालन हुन सकेको छैन । महानगरीय ट्राफिक प्रहरी महाशाखाका अनुसार विभिन्न नाका भएर उपत्यकाका भित्रने सवारीसाधनमा समेत कमी आएको छ ।
