पुस ८ गते पत्रकार महासंघको देशव्यापी प्रदर्शन
संचारमाध्यम अनुगमन तीव्र पार्ने
काठमाडौं, २८ मंसिर । नेपाल पत्रकार महासंघले माघ ८ गते संविधान जारी गर्न दवाव दिने उद्देश्यले पुस ८ गते संविधानसभा भवन छेउमा प्रदर्शन गर्ने निर्णय गरेको छ ।
काठमाडौंमा उपलब्ध केन्द्रीय समिति सदस्यहरुको आइतवार बेको बैठकले यस्तो निर्णय गरेको महासचिव उजिर मगरले विज्ञप्ती निकालेर जनाएका छन् ।
यसैगरी सोही दिन महासंघका जिल्ला शाखाले जिल्ला प्रशासन कार्यालय अगाडि प्रदर्शन गर्ने निर्णय भएको छ ।
यसबीचमा अन्तरक्रिया कार्यक्रमहरु जारी राख्ने निर्णय समेत महासंघले गरेको छ ।
महासंघको बैठकले श्रमजीवी पत्रकार ऐन कार्यान्वयनको समस्या थप जटिल बन्दै गएको भन्दै समाधानको लागि सञ्चारमाध्यमहरूमा पहल लिन जिम्मेवारी बाँडफाँड गरेको छ ।
अध्यक्ष डा. महेन्द्र विष्टले सरकारी स्वामित्वका सञ्चारमाध्यममा पहल लिनेछन भने उपाध्यक्ष खिलबहादुर भण्डारीले निजी स्वामित्वका रेडियोमा स्टेशनमा पहल लिनेछन् । यस्तै उपाध्यक्ष अनिता बिन्दुले टेलिभिजनहरूमा र महासचिव उजिर मगरले छापा तथा अनलाईन संचारमाध्यमहरुमा पहल लिने जिम्मेवारी पाएका छन् ।
