बलीउड चलचित्र ‘यारा’को निर्माण युनिट नेपालमा
बलीउड चलचित्र ‘यारा’को निर्माण टोली ४ दिनको छायांकनका लागि नेपाल आएको छ । चलचित्रका मुख्य कलाकार श्रुती हसन, इरफान खान, विद्युत सहितको ६२ जनाको टोली नेपाल आएको हो । उनीहरु यतिबेला काठमाण्डौको र्याडिसन होटलमा बसिरहेका छन् । दिकपाल सुतलियाको निर्देशनमा बन्न लागेको यो चलचित्रमा महिपाल सिंह राठोरको लगानी छ । चलचित्रको छायांकन पाटन दरबार र नगरकोटमा हुनेछ । नेपालबाट पनि केही कलाकारले काम गर्ने बताइएको यस चलचित्रमा चलचित्र प्राविधिक संघका अध्यक्ष मनोज केसी, महासचिव अनन्त तिमिल्सिना लगातका टोली आवद्ध छन् ।
पछिल्लो समय बलीउडका चलचित्रहरुको शुटिङ नेपालमा गर्ने क्रम बढ्दो छ । सुटिङ गर्नेदेखि बिभिन्न कार्यक्रममा सहभागी हुन बलिउड चलचित्रकर्मी नेपाल आईरहेका छन् । केही महिना अगाडी मात्र भारतका चर्चित अभिनेता अक्षय कुमारले अभिनय गरेको चलचित्र बेबीको छायांकन नेपालमा भएको थियो भने नायक आमिर खान एक कार्यक्रममा सहभागि हुन नेपाल आएका थिए । त्यस्तै यसै महिनाको अन्त्यमा भारतका चर्चित कमेडियन कपिल शर्मा र मेलोडी गायक सोनु निगम नेपालको एक संगीतिक कार्यक्रममा सहभागि हुनेछन् ।
