शीर्ष नेताहरुको चुनावी क्षेत्र टुंगो लगाउँदै एमाओवादी
काठमाडौं, १० असोज । एकीकृत नेकपा माओवादीले संविधानसभा निर्वाचनका लागि आफ्ना मुख्य नेताको उम्मेदवारी दिने चुनावी क्षेत्र बिहीवार घोषणा गर्ने तयारी थालेको छ ।
बिहीवार बस्ने कार्यालय र उम्मेदवार छनोट सिफारिस समितिको संयुक्त बैठकले मुख्य नेताको उम्मेदवारीलाई अन्तिम रुप दिने भएको हो । अध्यक्ष प्रचण्ड निवास लाजिम्पाटमा मध्यान्ह बैठक बस्ने अध्यक्ष प्रचण्डका प्रेस सहयोगी शिव खकुरेलले जानकारी दिनुभयो ।
मुख्य–मुख्य नेताको उम्मेदवारी क्षेत्रलाई अन्तिम रुप दिएर साँझसम्ममा सार्वजनिक गर्ने माओवादीले जनाइएको छ । माओवादीको कार्यालयमा अध्यक्ष पुष्पकमल दाहाल प्रचण्ड, नेताहरु बाबुराम भट्टराई, नारायणकाजी श्रेष्ठ र पोष्टबहादुर बोगटी हुनुहुन्छ । बोगटी उम्मेदवार छनोट समितिका संयोजकसमेत हुनुहुन्छ ।
छनोट सिफारिस समितिले मुख्य नेताको निर्वाचन क्षेत्र टुंग्याएर अन्तिम रुप दिन कार्यालयको बैठकमा पेश गर्न लागेको एक नेताले जानकारी दिनुभयो ।
